ဆောင်းဒဏ်သင့် ‘မောင်’
*********************
အအေးဒဏ်ဆိုး
ငါ့ရင်တိုး၍
အရိုးဆွေးချင် ဆွေးပါစေ။
တော၊တောင်၊ချောက်ကြား
ပူရှိန်များ၍
သွေးသားဆူချင် ဆူပါစေ။
ဆူး ၊ မြောင်၊ ချိုင့်ဝှမ်း
ခရီးကြမ်း၍
လှမ်းရခက်ချင် ခက်ပါစေ။
အစားအသောက်
ရိက္ခာခြောက်နှင့်
ဗိုက်မှောက်နေချင် နေပါစေ။
ချွေးတစ်ကိုယ်ဖုံး
မြေဖုန်လုံးနှင့်
နုန်းချိနေချင် နေပါစေ။
(သို့သော်ငြားလည်း)
ငါ့အသက် ကား
ပြည်သူများ၏
ငြမ်းဝါး တစ်တိုင်ဖြစ်စေသတည်း။ ။
ဧရာဝဏ် (မအူပင်)
ဖက်ဒရယ်ဂျာနယ်
ဒီဇင်ဘာ ၂၊ ၂၀၂၁