• Today is: Sunday, May 29, 2022

အသံမဲ့ဂီတ

အသံမဲ့ဂီတ

—-

*တိတ်ဆိတ်ခြင်းဟာ

သာယာနာပျော်ဖွယ်ကောင်းတဲ့

အကောင်းဆုံးဂီတ လွင်ပြင်

နှလုံးသားနဲ့ကြားရတဲ့ ရင်ခုန်သံစဥ်ပါ။

*နောက်ကျောကြည့်ကြည့်

ရင်ဘက်ကြည့်ကြည့်

ပစ္စုန်ပ္ပန်တည့်တည့်ကိုမြင်တတ်ရင်

အမှန်တရားနဲ့တွေ့ရမယ်။

*အမှန်ဆိုတာ

မဖောက်မပြန် မပြောင်းမလွဲ

ထာဝရမှန်နေမှ အမှန်စစ်တယ်

သူ့ဘက်ကမှန်ပြီး ကိုယ့်ဘက်ကမှားမှား

ကိုယ့်ဘက်ကမှန်ပြီး သူ့ဘက်ကမှားမှား

ဘက်လိုက်တဲ့ အမှန်ဆိုရင်

လွဲပါတယ်။

*မှားခြင်းကိုအကြောင်းပြလို့

အမှန်ဖြစ်မလာသလို

ဆင်ခြေဆိုတာ အမှားဖုံးကရိယာမဟုတ်

မင်း ၊ သူ ၊ ငါ ၊ ကျွန်ုပ်

စာအုပ်တွေထဲက ဝင်္ကဘာ။

*သတင်းဖြစ်ဖို့ သရုပ်မဆောင်ဘဲ

သရုပ်ဆောင်ရင်း သတင်းဖြစ်သွားတဲ့ လိမ်ညာမှု

ဘယ်သူ့ကိုတရားစွဲရမလဲ

တိတ်ဆိတ်ခြင်းဂီတ

အမှန်ငါ့မှာရှိနေတယ်

*အိပ်စက်ခြင်းနှင့် ငြိမ်သက်ခြင်း

သေဆုံးခြင်းတူသော်လည်း

နိုးထခြင်းနှင့် ပုပ်ပွခြင်းကွဲပြား

အမှန်တရားဆိုတာ ဘယ်တော့မှမမှား။

နိုင်ယုဝေ